मौजे सिकंदरपूर हे लातूर शहराच्या दक्षिणेकडील उपनगरात वसलेले एक प्रगतिशील गाव असून लातूर शहरापासून केवळ 3 कि.मी. अंतरावर आहे. हे गाव लातूर शहर मतदारसंघात समाविष्ट असून सन 2011 च्या जनगणनेनुसार गावाची लोकसंख्या 1,554 असून एकूण 315 कुटुंबे येथे वास्तव्यास आहेत.

गावामध्ये भव्य ग्रामसंसद भवन उभारण्यात आले असून या इमारतीत आपले सरकार सेवा केंद्र यशस्वीपणे कार्यरत आहे. या केंद्रामार्फत नागरिकांना विविध शासकीय ऑनलाईन सुविधा तसेच सर्व प्रकारचे दाखले वेळेवर उपलब्ध करून देण्यात येतात. 

गावातील धार्मिक वारसा अत्यंत समृद्ध असून शेषेनाथ महाराजांनी प्राणप्रतिष्ठा केलेले अनुसया मातेचे जागृत देवस्थान येथे विशेष प्रसिद्ध आहे. तसेच हनुमान मंदिर, विठ्ठल–रुक्मिणी मंदिर, श्रीकृष्ण खाटू श्याम मंदिर, एकलिंगेश्वर मंदिर व नृसिंह मंदिर अशी विविध देवस्थाने वर्षभर भाविकांनी गजबजलेली असतात.

स्मशानभूमीत मियावाकी पद्धतीने वृक्षलागवड करून एकूण 1,475 उंच वाढणाऱ्या वृक्षांच्या विविध प्रजाती तसेच आतमध्ये 200 वृक्ष लागवड करण्यात आली आहे. या उपक्रमामुळे परिसर अत्यंत निसर्गरम्य झाला असून वृद्धांसाठी बाकड्यांची व्यवस्था व हात धुण्यासाठी हँड-वॉश स्टेशन बसविण्यात आले आहे. त्यामुळे बाहेरून येणारे अधिकारी व मान्यवर या परिसराला ‘वैकुंठ धाम’ असे संबोधतात.

गाव शहरालगत असल्याने नव्या वस्त्यांचा मोठ्या प्रमाणावर विकास होत असून अंतर्गत रस्त्यांवर 5,000 झाडांची लागवड करून परिसर अधिक हिरवागार करण्यात आला आहे. कचरा व्यवस्थापनासाठी प्रत्येक घराला ओला व सुका कचरा वेगळा करण्यासाठी दोन कचरा कुंड्या पुरविण्यात आल्या आहेत व नियमित कचरा संकलनासाठी घंटागाडीची सोय करण्यात आली आहे.

अंगणवाडी व जिल्हा परिषद शाळांची रंगरंगोटी करून त्यांना अधिक आकर्षक व शैक्षणिकदृष्ट्या प्रेरक बनविण्यात आले आहे. चौथी व पाचवीचे वर्ग पूर्णतः डिजिटल करण्यात आले असून विद्यार्थ्यांसाठी आधुनिक बेंचेस, प्रोजेक्टर तसेच स्पोकन इंग्लिश शिकविण्यासाठी तज्ञ शिक्षकांची नियुक्ती करण्यात आली आहे. त्यामुळे शाळेतील विद्यार्थ्यांची उपस्थिती 100% राहते आणि ते उत्साहाने शिक्षण घेतात.

मौजे सिकंदरपूर हे स्वच्छता, पर्यावरण संवर्धन, डिजिटल शिक्षण आणि नागरिकाभिमुख सुविधा यांच्या माध्यमातून सतत प्रगतीपथावर असलेले एक आदर्श गाव म्हणून उदयास येत आहे.